يوميات زوجة نكدية --- فرحان و سعيدة

يوميات زوجة نكدية --- فرحان و سعيدة


فرحان راجل متفائل جدا و بيحب الحياة و بيعبر عن مشاعره لأسرته بالعطف و المحبة
سعيدة ست مش متفائلة خالص و شايفة الحياة نكد في نكد و مش عاجبها حالها و لا حال الدنيا و بتعبر عن مشاعرها بطريقتها الخاصة ...... الخاصة جدا


تعالوا نشوف بعض المواقف من حياتهم و ازاي سعيدة بتقلب الحق باطل و الباطل حق ، قدرات و مهارات فائقة في التجني علي الناس و تنقلب الحياة نكد في نكد


الحلقة الأولي : برص في الحمام


صحي فرحان من النوم علي صوت سعيدة ، بتصوت و تصرخ بأعلي صوتها

سعيدة : قوم يا فرحان ، قوم شوف المصيبة اللي احنا فيها

فرحان : خير يا سعيدة ، هي الساعة كام دلوقت

سعيدة : و هيجي منين الخير و أنت نايم و مش دريان بحاجة

فرحان : الساعة كام يا سعيدة

سعيدة : أربعة الفجر ، أنت لسه هتسأل عــ الساعة

فرحان : في أيه يا سعيدة ، مصحياني ليه الساعة ديه ؟؟؟؟؟

سعيدة : في برص في الحمام

فرحان : برص ، مش فاهم يعني أيه برص ؟؟؟؟

سعيدة : مش فاهم أيه ، بقولك برص ده كبير قوي أد التمساح

و قام فرحان من أحلاها نومة علشان يموت البرص، و دخل فرحان الحمام و قعد

يدور علــ البرص و مش لاقيه ، يدور في سلقط يدور في ملقط أختفي البرص

فرحان : فين يا سعيدة البرص ده ؟ أنا مش لاقيه

جت سعيدة و أستخبت ورا باب الحمام و بصت فوق الشباك و قلتله : أهوه

رجع فرحان أوضة النوم و جاب النظارة المكبرة و بص مكان ما شاورت سعيدة

و بالنظارة المكبرة شاف حاجة كدة صغيرةةةةةةةة ، افتكرها فـــ الأول نملة لكن

بعد ما شافها كويس لما غسل وشه ، و بص تاني عرف أنها برص ، لكن برص

من حديثي الولادة ، حاجة كدة متناهية في الصغر

فرحان : حرام يا سعيدة ، ده صغير قوي

سعيدة : يعني هنربيه مع العيال ، أنت عاوزه يكبر و ياكلنا

فرحان : طيب يا سعيدة ، هاتي البيروسول علشان نموته

سعيدة : و أنا مالي يا خويا ، علشان ألاقي واحد تاني متربص لي

فرحان : يعني هما مصتقصدينك يا سعيدة

سعيدة : أيوه ، و تلاقيك أنت اللي جايبهم البيت

فرحان : يعني أنا كنت عازمهم عــ العشا

سعيدة : و الله ماعرفش ، أسأل نفسك ، كل واحد أدري ببلاويه

فرحان : حقق عــ اللي جابوني يا سعيدة ، أنا اللي غلطان

و راح فرحان يجيب البيروسول علشان يقتل البرص و لما رجع ما لقاش البرص

فرحان : فين البرص يا سعيدة ؟

سعيدة : و أنا ايش عرفني ، أنا هشتغلك حارس عليه

فرحان : ماهو أنتي اللي خايفة منه يا سعيدة

سعيدة : هي وصلت لكده كمان ، وصلت للمعايرة

فرحان : فين البرص يا سعيدة ، خليني أموته و أخلص ، عاوز أنام

سعيدة : تنام !!!! و هيجيلك نوم ، طبعا ما ده اللي أنت فالح فيه

النوم و بس ، أنما تدافع عن أهل بيتك و تحميهم لأ لأ لأ

فرحان : أحميهم من أيه يا سعيدة ؟ هو البرص ده أسرائيلي

سعيدة : ده اللي أنا بخده منك ، تريقة علي خلق الله و بس

فرحان : حسبي الله و نعم الوكيل ، نامي يا سعيدة ، نامي

سعيدة : و كمان بتحسبن عليا ، و الله ما انا قاعدة لك في البيت

فرحان : أدخلي نامي يا سعيدة و أقصري الشر

سعيدة : أنا هاخد ولادي و أروح عند أهلي ، هما يحافظوا عليا

فرحان : عيب كدة يا سعيدة ، عيب عليكي اللي بتقوليه ده

سعيدة : أنا مش قادرة أصدق اللي بيحصل ، منك لله يا أخي ، منك لله

فرحان : حقك عا اللي جابوني يا سعيدة ، حقق عا اللي جابوني

سعيدة : خلاص المسامح كريم ، و أنا برده الأكرم

فرحان : تصبحي علي خير يا سعيدة ، أدخلي نامي

سعيدة : أنا حرة ، أنام ما نمش ، أنت مالك و مالي

فرحان : أقصري الشر يا سعيدة

سعيدة : أنا داخلة أنام ، تصبح علي خير يا حبيبي

فرحان : حبيبك ؟ أه صح ، أهو صباح و السلام

و دخل فرحان يلبس هدومه علشان يروح الشغل

و دخلت سعيدة تناااااااااام ، حقيقي نوم الظالم عبادة

الحلقة التانية : المدرسة و المذاكرة

رجع فرحان البيت بعد يوم طويل في الشغل ، و أول ما فتح باب الشقة سمع أصوات

غريبة ، خبط و رزع و تكسير و سمع صوت أبنه الكبير " مبسوط " عمال يعيط ،

أفتكر فرحان أنه و العياذ بالله في سطو مسلح عا لبيت ، و لقي مبسوط جاي جري عليه

مبسوط : ألحقني يا بابي ... ألحقني

فرحان : فيه أيه يا مبسوط ، فيه أيه يابني ، مامتك فين ؟؟؟

مبسوط : جوه يا بابي ، مصممة تضربني بعصاية المقشة

فرحان : ليه يا حبيبي ، أنت عملت حاجة غلط

مبسوط : أبدا و الله يا بابي ، هي فتحت كشكول الأينجلش و لقيتها فجأة عملت كدة

و فجأة فرحان و مبسوط لقوا سعيدة خارجة من باب الليفنج رووم و ماسكة في أيدها

حاجة كدة خشب رفيعة ، كانت هراشة ظهر أشتراها فرحان بــ 2.5 جنيه من محل

في أخر الشارع و كانت سعيدة بتستعملها في ضرب مبسوط و أخوه مسعود ... المهم

فرحان : أهدي يا سعيدة ، كفاية ضرب فــ العيال

سعيدة: أهدي أيه يا أخي ، دول جننوني .... جننوني

فرحان : أه و أنتي مش ناقصة يا سعيدة

سعيدة : يعني قصدك أيه ، عايز تقول عليا مجنونة

فرحان : هو أنا اللي قولت ، ما نتي اللي بتقولي يا سعيدة

سعيدة : بدل ما تطلعني مجنونة و طبعا أنت أعقل العاقلين أعرف اللي حصل

البيه أبنك ، جايب تسعة من عشرة في الأينجلش و أنا سهرانة جنبوه

طول الليل بذاكر له و كمان بيشخبط في الكراسة بتاعت الهوم ورك

مبسوط : ده كشكول يا بابي مش كراسة زي هي ما بتقول

سعيدة : هي .... يا قليل الأدب ، أنا هربيك ، لازم تنضرب هتشوف

مبسوط : هاهاها ،،، بابايا هيدافع عني ، بابايا حبيبي

فرحان : عيب يا حبيبي ،عيب كده يا مبسوط محدش يكلم مامي كده

سعيدة : هو ده اللي ربنا قدرك عليه ... عيب يا حبيبي ، بدل ما تاخده قلمين

فرحان : أنتي عارفة أني مابحبش الضرب ، الطيب أحسن

سعيدة : مش قادرة أفهم ، ليه مصمم تطلعني مجنونة ، حرام عليك يا أخي

فرحان : حرام عليكي أنتي أتقي الله في ولادك ، أتقي الله و كفاية نكد

سعيدة : خلاص يا حبيبي ، شيل أنت مسؤلية المذاكرة ، و خرجني أنا منها

فرحان : خلاص يا سعيدة ، أخرجي أنتي منها و أنا هتصرف

سعيدة : أخرج منها ، قصدك تطردني مــ البيت و الله مانا قاعدالك فيه

فرحان : هو حد جاب سيرة البيت يا سعيدة ، أحنا مش بنتكلم عا لمذاكرة

و طبعا عالصوت العالي صحي مسعود مــ النوم و قعد يعيط علشان عاوز يرضع

سعيدة : خلاص يا مبسوط ، أرتحت أنت و أبوك و صحتوهولي ، أرتحتوا

حرام عليكو حرام أنا عاوزة أنام ، كلكوا بتناموا و ترتاحوا الا أنا

بشتغلكوا خدامة و مولعلكوا صوابعي العشرة شمع و مش عاجب

أهئ أهئ أهئ أهئ أهئ أهئ أهئ أهئ أهئ أهئ أهئ أهئ أهئ أهئ أهئ أهئ أهئ

مبسوط : ألحق يا بابي ، مامي بتعيط

فرحان : بتعيطي ليه يا سعيدة ، هو كان حصل أيه لكل ده ؟؟؟؟

سعيدة : و كمان بتسأل حصل أيه ؟ أبنك مستقبله بيضيع و أنت مش حاسس

أنا أهم حاجة عندي هي المدرسة و الدراسة ، أهم حاجة ، أهم حاجة

فرحان : مستقبل أيه يا سعيدة ن ده لسه فــ كي جي تو

سعيدة : ما هو لو ما تعلمش يذاكر هيطلع فاشل ، و يشتغل سايس جراج

فرحان : سايس جراج ، أبني أنا ... ابن فرحان مسعد أبو فرحة يطلع سايس جراج

سعيدة : هو ده اللي أنت فالح فيه ، الألاطة و العرق التركي ، من تواضع لله رفع

فرحان : أحترمي نفسك و ما تجبيش سيرة أهلي ، أنتي فاهمة و ألا... أنتي عارفة

سعيدة : طب يا فرحان وريني كده هتعمل أيه ؟

فرحان : أقصري الشر يا سعيدة و أحترمي نفسك

سعيدة : أنا محترمة غصبن عنك

فرحان : ما هو باين يا سعيدة باين يا حبيبتي

سعيدة : حبيبتك ، طبعا ما أنت مش همك اللي حصل علشان تعملها حجة و تروح

المدرسة و تتساير مع الست سارة بتاعتك

فرحان : سارة مين يا سعيدة ؟؟؟؟؟

سعيدة : و النبي ايه ، سارة مدرسة الأنجليزي ، أعمل نفسك مش عارفها

مبسوط : أسمه أينجلش يا مامي

سعيدة : أنت فاكرني مش واخدة بالي من اللي بينكو

فرحان : أللي بيننا !!!!! هو أيه اللي بيننا يا سعيدة ؟؟؟؟

سعيدة : و كمان بتجمع نفسك معاها أودامي ، عيب عليك يا راجل أختشي شوية

و لا فاكرني ما شوفتش عنيك يوم أجتماع مجلس الأباء و أنت ما نزلتهاش

من عليها ، و هي رخرة عينيها يدب فيها رصاصة ، مش محترمة وجودي

و عمالة تتكلم معاك ، يا مستر فرحان ...يا مستر فرحان ، كل شوية ، مرقعة

بنات ، أسمع أنا لا يهمني المدرسة و لا الدراسة ، كل اللي يهمني كرامتي

فرحان : كرامة زوجتي ، تتاتتا تتاتتا

سعيدة : أنت عاوز تفرسني ، عاوز تموتني ، أنا أهلي عاوزني ، هسيبلك البيت باللي فيه

فرحان : أهدي يا سعيدة أهدي و حقك عا اللي جابوني يا سعيدة ، حقق عا اللي جابوني

سعيدة : لا حق و لا باطل ، أنا داخلة أنام ، تصبح علي خير

و دخل فرحان يغير هدومه علشان يروح يقعد مع أصحابه عا لكافيه

و دخلت سعيدة تناااااااااام ، حقيقي نوم الظالم عبادة